Suratu Yasin, daya daga cikin surorin Al-Qur’ani mai tsarki, tana da matukar muhimmanci a rayuwar Musulmi.
Wannan sura, wacce take cikin Juzu’u na 23, tana kunshe da sakonni masu karfi wadanda suke taimakawa wajen karfafa imani da ciyar da rayuwar Musulmi gaba daya.
A sani cewa Suratul Yasin ba tada Wani Girma ko fifiko akan Sauran surorin Alqurani, Babu wata hadisi ingantace dake nuna fifikon ta akan Sauran surori
Duk da haka ita sura ce a cikin Alqurani Kuma ana iya karantata da niyya kuma tawwasulin da ita kamar yadda shari’ar ta Fada kuma za’a iya yin hakan akan Sauran sororin cikin Alqurani
Baya ga haka ga jerin Wasu surori wadanda aka sumu nassi na hadisi bisa ingancin su ga Mai Karantata Yana Mai Imani da Takawa
1. Suratul Fatiha (Ummul Kitab)
Suratul Fatiha, wacce ake kira “Uwar Littafi,” ita ce surar farko a cikin Al-Qur’ani. Ta na daya daga cikin mafi muhimmancin surah kuma ana karanta ta a cikin kowane raka’a na sallah Farilla ko na Nafila
Amfaninta:
- Tana warkar da cututtuka na zahiri da na ruhi.
- Tana zama addu’a domin neman taimako daga Allah.
- Tana tabbatar da matsayin Allah a matsayin Ubangijin talikai.
2. Suratul Bakara
Suratul Baqara ita ce sura mafi tsawo a cikin Al-Qur’ani tana da ayoyi gida 286 kuma tana dauke da shiriya da tsare-tsaren rayuwar Musulmi.
Amfaninta:
- Tana kare gidaje daga sharrin aljannu da shedanu.
- Karatun ayar karshe na surar yana bayar da kariya daga sharri kafin kwanciya barci.
- Tana karfafa imani da tsoron Allah.
Annabi Muhammad (SAW) ya ce:
“Ku karanta Suratul Baqara, domin shaidanu ba sa shiga gidajen da ake karanta ta.”
3. Suratul Ikhlas (Tauhidi)
Suratul Ikhlas tana tabbatar da tauhidi da kamalar Allah. Duk wanda ya karanta ta, yana samun lada mai yawa.
Amfaninta:
- Tana tabbatar da imani ga Allah daya tilo.
- Karanta ta sau uku yana daidai da karanta Al-Qur’ani duka.
- Tana kare mutum daga sharrin mutane da aljannu.
- Idan aka karanta ta so goma Allah zai Gina Maka gida a cikin Aljanna
Manzon Allah (SAW) ya ce:
“Suratul Ikhlas tana daidai da kashi daya bisa uku na Al-Qur’ani.”
4. Suratul Mulk (Tabaraka)
Suratul Mulk tana magana kan mulkin Allah da ikonSa akan komai.
Amfaninta:
- Tana kare mai karatunta daga azabar kabari.
- Tana zama hujja ga wanda yake karanta ta akai-akai.
- Tana tunatar da mutum muhimmancin neman gafara daga Allah.
Annabi (SAW) ya ce:
“Suratul Mulk tana kare wanda ya saba karanta ta daga azabar kabari.”
5. Suratul Kahf
Suratul Kahf tana da matukar muhimmanci musamman a ranakun Juma’a.
Amfaninta:
Tana kare mutum daga fitinar Dajjal.
Tana kawo haske a rayuwa da lahira.
Karanta ta yana kawo nutsuwa da tsaro.
Manzon Allah (SAW) ya ce:
“Duk wanda ya karanta Suratul Kahf a ranar Juma’a, zai sami haske daga wannan Juma’a zuwa ta gaba.”
6. Suratul Falaq da An Nas
Wadannan surori biyu ana kiransu Mu’awwidhatain (surorin neman kariya).
Amfaninsu:
- Tana kare mutum daga sharrin sihiri da hasada.
- Tana kariya daga sharri na mutane da aljannu.
- Ana amfani da su wajen warkar da cututtuka ta ruhi.
Manzon Allah (SAW) ya ce:
“Babu wani abin kariya da ya fi Suratul Falaq da Suratun Nas.”
Kammalawa
Surorin Al-Qur’ani suna dauke da albarka da rahama ga masu karatunsu da bin umarnin Allah. Allah ya sa mu kasance cikin wadanda suke karatun Al-Qur’ani da aiki da shi. Ameen.