Shugaban majalisar wakilai, Abbas Tajuddeen, ya nada fitaccen mawakin Kano, Aminu Ladan Abubakar, wanda aka fi sani da Alan Waka, a matsayin babban mataimaki na majalisar. Wannan nadin ya jawo murnar masoyan mawakin da abokansa, suna taya shi murna da addu’o’in nasara.
Alan Waka ya sanar da wannan labari mai dadi ga mabiyansa a shafinsa na Facebook, inda ya bayyana farin cikin sa da wannan sabon mukami. A cikin sakon sa, ya ce: “Na amince da karbar wannan aiki, kuma ina neman addu’ar masoyana da Allah ya taimaka mini wajen sauke nauyin da aka dora mini.”
Mawakin, wanda yanzu zai rika karbar albashi a matsayin ma’aikacin gwamnati na mataki na 16, ya bayyana cewa yana fatan amfani da wannan dama don inganta al’umma da kuma tallafa wa matasan jihar Kano.
Masu sharhi sun yi maraba da wannan nadin, inda suka ce Alan Waka ya cancanci wannan mukami saboda jajircewarsa da kuma himma wajen tallafa wa al’umma. Kawai kwanan nan, wani shahararren jarumi, Sani Danja, ma ya samu mukamin babban mai ba da shawara ga gwamnan Kano kan harkokin matasa da wasanni.
Wannan sabuwar mukami na Alan Waka na da tasiri sosai a fannin nishadi da al’adu a jihar Kano, inda ake sa ran zai kawo canji mai kyau a harkokin majalisar wakilai.