Shahararriyar mai yada labarai, Francess Ogbonnaya, ta zargi Farfesa Sandra Duru da shirya muryar bogi domin bata sunan Sanata Natasha Akpoti-Uduaghan. A cewarta, an biya ta N300,000 don ta hada sautin muryar da aka yi amfani da shi wajen zarginta da wasu maganganu da suka jawo cece-kuce.
Ogbonnaya ta bayyana cewa daga cikin abubuwan da aka zargi Sanata Natasha da su, akwai zargin cewa tana ƙoƙarin kifar da gwamnatin Yarbawa. Wannan zargi ya tashi hankali, inda Ogbonnaya ta ce, “Ta yaya za a yi tunanin cewa Sanata Natasha za ta yi hakan, alhali ba ta da rinjaye a Najeriya?”
Bayan wannan, Ogbonnaya ta bayyana cewa Farfesa Sandra Duru ta tura mata rubutaccen saƙo inda ta bukaci ta karanta wani saƙo da muryarta, amma ta ƙi saka sassan da take ganin suna ɗauke da sharri. Wannan ya jawo hargitsi tsakanin su.
Daga cikin takardun da Ogbonnaya ta gabatar akwai hotunan tattaunawa ta WhatsApp da rasitin biyan kuɗin da ta karɓa. Sanata Natasha ta bayyana cewa tana cikin fargaba game da shirin da jami’an tsaro suka yi na cafke ta daga Amurka, wanda ta danganta da taron IPU da ta halarta.
Wannan al’amari ya jawo hankalin jama’a, inda ake ci gaba da tattauna game da tasirin wannan makirci a fagen siyasa a Najeriya.