A cikin wani sabon ci gaba a siyasar Najeriya, shugabannin adawa, Atiku Abubakar da Peter Obi, na shirin sauya sheka zuwa jam’iyyar Social Democratic Party (SDP) domin tunkarar shugaban ƙasa Bola Ahmed Tinubu a zaben 2027. Tsohon dan takarar shugaban kasa a SDP, Adewole Adebayo, ya bayyana cewa wakilan Atiku da Obi suna tattaunawa kan wannan shiri.
Adebayo ya ce jam’iyyar SDP ta karbi tsohon gwamnan jihar Kaduna, Nasir El-Rufai daga APC, kuma ta bude kofofinta ga dukkan masu kishin kasa. A wata tattaunawa da ya yi a tashar Channels TV, ya bayyana cewa akwai bukatar hadin kai tsakanin manyan ‘yan siyasa don cimma nasara a zabe mai zuwa.
Ya kara da cewa: “Mutane na shiga jam’iyyarmu, kuma muna karbarsu hannu bibbiyu. Idan dukkan ‘yan siyasar suka bi dokokin SDP, za mu iya kafa sabuwar tafiya da za ta kayar da APC a gaba.”
Adebayo ya bayyana cewa idan Atiku da Obi sun shiga SDP, za su kasance cikin tsarin da zai kawo canji ga al’ummar Najeriya. Hakan na nuni da karuwar jam’iyyar, tare da jaddada bukatar kyautatawa da inganta harkokin siyasa a kasar.
Shugaban SDP ya bayyana cewa suna maraba da duk wanda ke da niyyar canji da biyayya ga doka, yana mai cewa jam’iyyar za ta ci gaba da aiki domin kawo gagarumar nasara a zaben 2027.