Majalisar dokokin jihar Rivers ta fara aiwatar da matakai na tsige Gwamna Siminalayi Fubara da mataimakiyarsa, Ngozi Odu, bisa zarge-zargen da suka shafi aikata laifuffuka. Wannan mataki ya biyo bayan sanarwar da majalisar ta fitar, inda ta bayyana cewa an yi wannan bisa ga tanadin kundin tsarin mulkin Najeriya na 1999.
Ana zargin Gwamna Fubara da karkatar da kudin jama’a da kuma hana majalisar gudanar da aikinta yadda ya kamata. Hakan ya jawo zarge-zargen cin gashin kansa wajen kashe kudaden gwamnati ba tare da bin ka’ida ba, da kuma nada mukarrabai ba tare da tantance su ba.
Majalisar ta kuma zargi mataimakiyar gwamnan da taimakawa wajen aikata wadannan laifuffuka da suka ci karo da doka, ciki har da hana biyan albashin wasu ‘yan majalisar.
Kakakin Majalisar Dokokin Rivers, Martin Amaewhule, ya aika da wasikar tuhume-tuhumen ga gwamna Fubara da mataimakiyarsa, inda aka bukaci su mayar da martani kafin a dauki matakin gaba. Wannan mataki na majalisar ya jawo ce-ce-ku-ce a cikin jihar, inda jam’iyyun siyasa suka raba ra’ayi kan batun.
Nyesom Wike, tsohon gwamnan jihar, ya bayyana cewa ba laifi ba ne a tsige Fubara idan har an samu hujjoji masu inganci. Wannan yana nuna cewa al’amura na kara ta’azzara a jihar Rivers, inda ake fatan samun gaggawar warware matsalolin da suka taso.
Majalisar ta bukaci gwamna Fubara da ya yi kokarin warware wannan rikici, domin tabbatar da ci gaban jihar da kuma inganta shugabancinsa.