Tsohon gwamnan jihar Kaduna, Malam Nasiru El-Rufa’i, ya bayyana cewa ba zai iya tabbatar da ko zai tsaya takarar shugabancin ƙasa a shekara ta 2027 ba. Wannan bayani ya biyo bayan sauya shekarsa daga jam’iyyar APC zuwa jam’iyyar SDP a cikin makon da ya gabata.
El-Rufa’i ya yi wannan bayani ne a wata hira da BBC, inda ya bayyana cewa wannan hukunci na takara yana hannun jam’iyya da al’umma. Ya ce: “Ban sani ba. Ai ba ni ne zan ce zan yi takara ba. Jam’iyya ce da mutane za su kira ka su ce ka tsaya takarar wannan muƙami ko wancan.”
Tsohon gwamnan ya bayyana cewa a baya, mutane sun roƙi Muhammadu Buhari ya umarce shi da tsayawa takarar gwamna a 2015, wanda hakan ya sa ya tsaya takara duk da cewa ba ya son hakan a lokacin.
Har ila yau, El-Rufa’i ya bayyana ra’ayinsa kan maganar da ya yi a shekarar 2022, inda ya ce “babu dattijo a Arewa.” Ya bayyana cewa kalamansa suna nufin ‘yan siyasa ne, ba dattijai na gaske ba, wanda ke karɓar kuɗi daga masu takara.
A karshe, El-Rufa’i ya bayyana fatan haduwa da tsohon mataimakin shugaban kasa, Atiku Abubakar, da Peter Obi a SDP, domin kara karfin ‘yan adawa a zaben 2027.