Kungiyar matasan jam’iyyar SDP ta bayyana rashin gamsuwarsu da shigowar tsohon gwamnan jihar Kaduna, Malam Nasir El-Rufai, cikin jam’iyyar. Matasan sun yi zargin cewa El-Rufai ya shigo jam’iyyar ne domin biyan bukatunsa na siyasa, ba don inganta ta ba.
Shugaban kungiyar matasan SDP na ƙasa, Kwamared Abdulsamad Bello, ya bayyana cewa “babu wani alheri da jam’iyyar za ta samu saboda zuwan El-Rufai.” Ya zargi tsohon gwamnan da yunƙurin kwace shugabancin jam’iyyar, yana mai cewa kowa ya san halin El-Rufai na murƙushe ƴan adawa.
Matasan sun yi watsi da shigowar El-Rufai, suna mai cewa hakan na iya haifar da rarrabuwar kawuna a tsakanin mambobin jam’iyyar. Bello ya ce, “El-Rufai bai taɓa yarda da dimokraɗiyya ba, kuma tarihin sa na murƙushe ‘yan adawa ba ɓoyayye ba ne.”
Bayan shigowar El-Rufai, wasu magoya bayan sa sun gudanar da zanga-zanga a hedkwatar jam’iyyar, suna kira ga sakataren jam’iyyar na ƙasa, Olu Agunloye, da ya yi murabus. Wannan ya nuna cewa El-Rufai na fuskantar kalubale mai yawa a cikin SDP.
Matasan sun yi gargadi cewa shigowar El-Rufai na iya jefa jam’iyyar cikin mummunan hali, suna mai cewa “El-Rufai ba ya shigo domin ya inganta jam’iyyar, sai don ya rusa ta.” Wannan rahoton na nuna cewa al’ummar matasan na ci gaba da bayyana damuwarsu game da makomar jam’iyyar a Najeriya.