A ranar Talata, 4 ga Maris, 2025, ƴan bindiga sun kai hari a ƙauyen Madaddaban Fegi cikin ƙaramar hukumar Batsari a jihar Katsina, lamarin da ya jawo fargaba a tsakanin mazauna yankin. Harin ya faru ne a lokacin azumin watan Ramadan, inda ƴan bindigan suka hallaka mutum guda mai shekaru 30, Sanusi Iliyasu.
Bayan samun labarin harin, jami’an tsaro sun yi gaggawar kai dauki, amma sun sami ƴan bindigan sun tsere zuwa dajin Safana kafin su iso. Wannan lamari ya sake bayyana matsalar tsaro da ke addabar yankin, duk da kokarin da aka yi na samun sulhu da ƴan bindigan a baya.
Masana a harkokin tsaro sun bayyana cewa hare-haren ƴan bindiga sun zama ruwan dare a yankunan Batsari, Safana, da Jibia, wanda ya jefa al’umma cikin fargaba da tsoro. Mazauna yankin sun bukaci hukumomi su ƙara matakan tsaro domin kare rayuka da dukiyoyinsu, musamman a wannan lokaci na azumi.
Hare-haren sun jawo hankalin al’umma tare da nuna damuwarsu kan yawaitar wannan matsala, inda suka yi kira ga gwamnatin tarayya da ta dauki matakan gaggawa don dakile hare-haren ƴan bindiga a cikin kasarnan. Al’ummar yankin na fatan ganin ingantaccen tsarin tsaro da zai tabbatar da zaman lafiya a kauyukansu.