Hon Usman Zannah, dan majalisar wakilai daga jihar Borno, ya gudanar da aikin tallafawa talakawa a mazabarsa ta Kaga/Magumeri/Gubio. Wannan tallafi ya shafi raba kayan abinci da kudade ga mutane 5,000 domin rage wahalhalu a lokacin azumin Ramadan.
Tallafin ya hada da buhunan shinkafa, sukari, katan-katan na taliya da sauran kayan girki, tare da gudummawar kudi da aka bayar domin taimakawa al’umma a wannan lokaci na ibada. Hon. Zannah ya bayyana cewa wannan mataki na nufin taimakawa al’umma da suka fuskanci kalubale na tattalin arziki, musamman a wannan watan mai alfarma.
A yayin taron raba tallafin, Hon. Zannah ya yaba wa shugabannin gwamnati kan kokarinsu na tabbatar da zaman lafiya a yankin. Ya kuma jaddada cewa an zabi wadanda suka ci gajiyar tallafin ba tare da la’akari da bambancin siyasa ko kabila ba, domin hada kan al’umma.
Dan majalisar ya bayyana cewa, “Watan Ramadan wata ne da aka saukar da Al-Qur’ani, wanda ke matsayin shiriya da rahama ga masu kyautatawa.” Hakanan, ya yi alkawarin ci gaba da bayar da tallafin a duk lokacin da aka bukata, da nufin inganta rayuwar talakawa a mazabarsa.
Wannan aikin tallafawa ya jawo hankalin al’umma, inda suka nuna godiya ga Hon. Zannah bisa wannan kyakkyawan aiki da ya yi a lokacin da ya dace.