Wani mamba daga kwamitin ganin wata a fadar sarkin Musulmi, Simwal Usman Jibril, ya bayyana hanyoyin da ake bi wajen tantance bayyanar jinjirin wata a lokacin azumi da sauran lokutan shekara.
A cewar Simwal, kwamitin yana amfani da na’ura wajen tantance jinjirin wata, duk da cewa har yanzu ba a fara amfani da ita wajen duba wata kai tsaye a Najeriya. Ya jaddada cewa tun daga ranar 25 ga wata, ake fara fadakarwa kan duba wata saboda muhimmancin wannan al’amari.
Masana taurarai sun yi hasashen cewa ranar da za a ga watan Ramadan na 2025 a Najeriya tana yiwuwa a ranar Juma’a. Simwal ya bayyana cewa bayanan falaki sun nuna yiwuwar ganinsa, sai dai idan wasu dalilai sun hana ganin sa.
Kwamitin ya ce don tabbatar da sahihancin ikirarin ganin wata, ana yi wa mutanen da suka ce sun hango jinjirin wata tambayoyi guda biyar, ciki har da lokacin da suka ga shi da kuma yanayin da aka hango shi.
Simwal ya kuma yi kira ga al’ummar Musulmi da su fita don neman jinjirin wata idan lokaci ya yi, tare da sanar da hakimai ko dagatai idan sun hango shi. Wannan yana daga cikin kokarin rage rudani kan ganin wata, wanda a baya ya janyo sabanin ra’ayi tsakanin mutane.
Gwamnatin fadar sarkin Musulmi ta bukaci al’ummar Musulmi da su rika bin umarnin da aka bayar kan ganin watan, domin samun hadin kai a cikin al’umma. Wannan mataki na da matukar muhimmanci wajen tabbatar da cewa an fara azumin Ramadan a lokaci guda a duk fadin Najeriya.