Jami’an tsaro sun gudanar da matakan tsaro a gidan Sarkin Kano na 15, Aminu Ado Bayero, bayan samun rahotannin sirri game da shirin wasu ‘yan daba na tayar da hankali a jihar.
Kakakin rundunar ‘yan sandan jihar, SP Abdullahi Haruna Kiyawa, ya bayyana cewa an jibge jami’an tsaro a yankin, suna sanye da kayan yaki da fuskokinsu a rufe. Wannan mataki na tsaro ya jawo hankalin mazauna Kano, inda wasu daga cikinsu suka bayyana fargabarsu game da yawan jami’an tsaro da aka tura wurin.
Wani mazaunin yankin ya bayyana cewa, “Da muka ga dakarun soji suna dauke da mugayen makamai suna rufe titin, mun cika da mamaki.” Hakan ya sa mutane da dama suka fara duba hanyoyin da za su bi domin kaucewa dakarun tsaro.
A cikin sanarwar da ya fitar, SP Kiyawa ya tabbatar da cewa sun karbi rahotannin sirri da suka nuna cewa matasan suna shirin gudanar da wata zanga-zanga. Duk da haka, rundunar ta yi gaggawar daukar matakan kariya don dakile duk wata barazana da ka iya tasowa.
Rundunar ‘yan sandan Kano ta kama mutum 17 da ake zargin suna da hannu wajen shirya zanga-zangar, tare da bayyana cewa suna shirye-shiryen dakile duk wani tashin hankali a jihar.
Jama’a na zaman fargaba tsakanin wannan tsaurara tsaro da aka yi, suna fatan cewa hukumomin tsaro za su tabbatar da zaman lafiya da tsaro a Kano.