Tsohon gwamnan Jihar Kaduna, Nasir El-Rufai, ya bayyana cewa tsohon shugaban kasa Muhammadu Buhari ne ya tilasta masa neman takarar gwamna a jihar. El-Rufai ya bayyana hakan ne a cikin wata tattaunawa da ya yi da Arise TV, inda ya ce ba shi da burin tsayawa takara a wancan lokaci.
El-Rufai ya ce, “Ku tambayi Buhari, shi ne ya tilasta min tsayawa takarar gwamna saboda ina jin tsoro.” Ya kara da cewa duk da haka, yana da kwarewar aiki a fannin siyasa, amma idan jam’iyyar APC ta gaza kiyaye dabi’unsa, zai yi la’akari da sauya jam’iyya.
Ya jaddada cewa, “Buhari ya ce: ‘Tafi ka tsaya takarar gwamna.’ Na ce, ‘A’a, Malam, ba ni da wannan kwarewar, na fi cancanta a bangaren fasaha.’ Amma ya dage.”
El-Rufai ya bayyana cewa zai ci gaba da zama a siyasa har abada, amma ba lallai ne ya ci gaba da tsayawa takara ba. Hakanan, ya yi fatan shugabannin jam’iyyar APC za su gyara kura-kuransu domin kawo sauyi a ƙasar.
A cewarsa, idan APC ba ta gyara kanta ba, zai nemi wata jam’iyya da ke da dabi’u irin na sa domin ci gaba da aiki a fannin siyasa. El-Rufai ya yi fatan hadin kai tsakanin Arewa da Kudu maso Kudu wajen ceto Najeriya daga matsalolin da ke fuskanta.