An bayyana cewa Bello Turji, babban shugaban ƴan bindiga a yankin Zamfara, yana fuskantar matsalar tsaro mai tsanani, wanda hakan ya sa ya koma ga malaman tsubbu don neman taimako. Wannan mataki na nuni da yadda yake jin tsoron kamun da dakarun soji ke shirin yi masa.
Bello Turji ya shirya taron tattaunawa da malaman tsubbu domin su yi masa addu’a da ba da shawarwari kan dabarun da za su taimaka masa wajen kaucewa farmakin sojoji na rundunar Operation Fansan Yamma, wanda ke kokarin cafke shi. Malaman tsubbu suna da alaka da shi tun kafin yanzu, suna ba shi goyon baya da shawarwari kan hare-haren da ya kamata ya kai.
Masanin harkokin tsaro, Zagazola Makama, ya bayyana cewa Bello Turji na kara samun goyon baya daga malaman tsubbu, wadanda ke taimaka masa wajen tsara dabarun gudanar da ayyukan ta’addanci. Wannan yana nuni da cewa akwai hadin kai tsakanin masu tayar da hankali da malaman da ke ba da shawarwari kan irin hare-haren da ya kamata a kai.
Majiyoyi sun bayyana cewa wannan al’amari na jefa al’umma cikin fargaba, yayin da sojoji ke kara matsa lamba kan Bello Turji a duk fadin jihohin Zamfara da Sokoto. Ana sa ran cewa wannan hali na Bello Turji zai iya haifar da karin tashin hankali a yankin, idan ba a dauki matakan da suka dace ba.
A halin yanzu, dakarun soji na ci gaba da gudanar da ayyuka a yankin don tabbatar da tsaro, inda ake fatan samun nasarar kawo karshen ta’addanci da ke addabar al’umma.