A wani sabon ci gaba a rikicin masarautar Kano, tsohon sanata Shehu Sani ya bayar da wata sabuwar shawara kan yadda za a sasanta tsakanin masu rikicin, Aminu Ado Bayero da Sanusi II. A cewar Shehu Sani, ya kamata a buga wasan kwallon kafa domin warware wannan rikici maimakon ci gaba da jefa kowa a kotu.
A cikin wani sako da ya wallafa a shafinsa na Facebook, Sanata Sani ya ce wanda ya yi nasara a wasan zai zama sarki kai tsaye. Ya bayyana cewa wannan zai zama hanyar da ta dace wajen tantance wanda ya kamata ya hau gadon masarautar, tare da cewa zai iya zama alkalin wasan.
Ra’ayin Shehu Sani ya jawo cece-kuce a tsakanin jama’a, inda wasu suka bayyana goyon bayansu ga wannan shawara, yayin da wasu kuma suka nuna rashin amincewa da ita. Wasu daga cikin masu ra’ayi sun ce wannan dabara ta yi kama da wauta, suna mai cewa ya kamata a ci gaba da bin hanyoyin da suka dace na shari’a.
A halin yanzu, kotun daukaka kara na ci gaba da shari’ar tsakanin bangaren Aminu Ado da gwamnatin Kano, wanda ya haifar da fargaba a tsakanin al’ummar jihar. Duk da haka, shawarar Shehu Sani ta jawo hankalin jama’a, suna kallon wannan lamari a matsayin wani sabon salo a harkokin siyasa da al’adar masarautar Kano.
Jama’a suna sa ran ganin yadda wannan shawara za ta shafi rikicin da ya dade yana faruwa a jihar.