Ƙaramin ministan tsaro, Bello Matawalle, ya yi kira ga ƙarin kuɗaɗe domin inganta tsaron jihar Katsina, yana mai cewa idan aka ba da isassun kayan aiki, za a iya magance matsalar ƴan bindiga cikin watanni biyu.
A cikin jawabin da ya yi yayin gaban kwamitin tsaro na majalisar wakilai, Matawalle ya jaddada cewa gwamnati ta ware Naira biliyan 50 a kasafin kuɗin 2025, wanda ya ce ba ya isa wajen magance matsalar rashin tsaro a ƙasar. Ya bukaci ƴan majalisar da su ƙara wa ma’aikatar tsaro kuɗaɗe domin siyan motocin yaƙi guda 50.
Matawalle ya ce, da motocin, sojojin Najeriya za su iya fatattaka ƴan ta’addan daga dazuzzukan Katsina cikin watanni biyu. Ya yi nuni da cewa rashin kayan aiki yana da tasiri wajen hana samun nasara a yaki da ta’addanci a yankin.
Har ila yau, ya bayyana cewa duk da shirin gwamnati na inganta tsaro, akwai buƙatar a samar da karin kayan aiki da kuɗi domin tabbatar da zaman lafiya a jihar. Wannan bayanin na Matawalle na zuwa ne a lokacin da jihar Katsina ke fama da matsalar ƴan bindiga da ke addabar al’umma.
Matawalle ya yi kira ga gwamnati da ta dauki matakan gaggawa don magance wannan matsala, yana mai cewa tsaro na da matukar muhimmanci ga ci gaban al’umma da tattalin arziki.