A yayin da ake ta hasashe kan hadakar jam’iyyun adawa a Najeriya, tsohon gwamnan jihar Kaduna, Nasir El-Rufai, ya gudanar da ganawa da Manjo Hamza Al-Mustapha da kuma shugaban jam’iyyar SDP, Segun Showunmi a birnin Tarayya Abuja. Wannan ganawa ta kasance mai matuƙar muhimmanci, musamman a cikin halin da ƙasar ke ciki da shirye-shiryen zabe na 2027.
Shugaban kungiyar yan adawa, Otunba Segun Showunmi, ya tabbatar da cewa ganawar ta kasance domin tattaunawa kan karfin jam’iyyun da ke adawa da gwamnatin Bola Tinubu, tare da duba yadda za a inganta haɗin kai a tsakanin jam’iyyun.
Hakanan, ana sa ran hadakar jam’iyyun adawa za ta ba da damar tunkarar zabe na 2027 da aka shafe shekaru ana shirin sa, musamman ganin cewa akwai ra’ayoyi masu karfi kan salon mulkin gwamnatin yanzu.
Daga cikin jiga-jigan da ke cikin wannan hadaka akwai Atiku Abubakar, dan takarar shugaban kasa a PDP, da Peter Obi na jam’iyyar LP. Sai dai, Sanata Rabi’u Kwankwaso, jagoran jam’iyyar NNPP, ya ki yarda da wannan hadaka, yana mai cewa babu wata yarjejeniya da suka yi kan karba-karba.
Ganawar ta kuma jawo cece-kuce kan yiwuwar barin jam’iyyar APC daga El-Rufai, wanda hakan na nuna cewa akwai yiwuwar sauyi a fagen siyasar Najeriya. El-Rufai da Al-Mustapha sun shirya tattaunawa kan halin da ake ciki a bangaren adawa da ci gaban dimokuradiyya a Najeriya.