AbdulMajid Dan Bilki Kwamanda ya zargi gwamnan Kano, Injiniya Abba Kabir Yusuf, da soke sunansa daga jerin masu tafiya aikin hajji na shekarar 2023. Kwamandan ya bayyana cewa Mataimakin Shugaban kasa, Kashim Shettima, ne ya ba shi damar tafiya, amma gwamnan Kano ya hana shi.
A cikin wani bidiyo da ya wallafa a shafinsa na Facebook, Dan Bilki Kwamanda ya nuna takaicinsa kan yadda gwamnan Kano ya cire sunansa bayan ya biya kudin aikin hajji don iyalansa. Ya bayyana cewa wannan mataki ya sabawa hakkin sa, yana mai jaddada cewa babu dalilin da ya sa gwamnan ya soke sunansa.
Dan Bilki Kwamanda ya yi zargin cewa wasu manya ne suka ba Lamin Danbappa umarnin cire sunan sa daga jerin masu tafiya hajji. Ya kuma bayyana cewa wannan lamari ba zai tozarta shi ba, yana mai cewa yana da ‘yancin fadin albarkacin bakinsa.
Haka zalika, ya bayyana cewa yana da hakkin zuwa aikin hajji kuma ya yi kokarin bayyana cewa wannan tsari na cire suna ya sabawa doka.