Wani limamin cocin Anglican a jihar Ondo, mai suna Cannon Olowolagba, ya faɗa hannun ƴan bindiga tare da iyalansa a makon da ya gabata. Malamin yana tafiya ne tare da matarsa da ƴaƴansa guda biyu lokacin da ƴan bindigan suka tare su a hanya.
A cewar rahotanni, Ƴan bindigan sun fara neman kuɗin fansa naira miliyan 10, amma daga bisani sun ƙara wannan adadi zuwa miliyan 75. Wannan lamari ya faru ne a hanyar Ise Akoko-Iboropa a ƙaramar hukumar Akoko ta Arewa maso Gabas ta jihar Ondo.
Bishop na cocin Anglican Diocese, Babajide Bada, ya tabbatar da faruwar lamarin, yana mai cewa ƴan bindigan suna ci gaba da kira don neman kuɗin fansa. Ya ce, “Tun lokacin da suka yi garkuwa da su, suna ta kiran waya suna neman kuɗin fansa.”
Kwamandan rundunar tsaro ta Amotekun a jihar, Akogun Adetunji Adeleye, ya tabbatar da cewa suna aiki tare da sauran hukumomin tsaro don ceto malamin da iyalansa. Ya ce, “Muna kokarin ganin an kuɓutar da mutanen da abin ya shafa.”
Hakanan, kakakin rundunar ƴan sandan jihar, Misis Funmilayo Odunlami, ta ce suna ci gaba da bincike kan lamarin, duk da cewa ba ta bayar da karin bayani ba. Wannan lamari ya jawo fargaba a cikin al’umma, inda ake kira a yi ƙarin matakan tsaro don kare rayukan mutane daga hare-haren ƴan bindiga.
Wannan sace-sacen na limamin addini yana nuni da yadda ƴan bindiga ke ci gaba da barazanar tsaro a Najeriya, inda ake fama da ƙarin hare-hare da garkuwa da mutane a cikin ƙasar.