Jami’ar Bayero ta Kano ta sanar da karin girman Dr. Muhammad Sani Umar Rijiyar Lemo zuwa matsayin Farfesa a fannin Hadisin Manzon Allah (SAW). Wannan karin girma ya nuna gagarumin hazaka da kwarewa a ilimin addinin Musulunci, wanda ya shahara a ciki da wajen Najeriya.
Al’umma da dama suna taya Sheikh Rijiyar Lemo murna, suna yi masa addu’o’in fatan alheri a sabon matsayin da ya samu. Malamin ya kasance mai rubuce-rubuce da koyarwa a fannin addini, tare da gudanar da karatuttuka a Jami’ar Musulunci ta Madina, inda ya samu horo mai zurfi.
A cikin sanarwar da aka fitar, an bayyana cewa karin girman malamin yana da matukar muhimmanci ga ci gaban ilimin addinin Musulunci a Najeriya. Al’umma na ganin wannan mataki zai kara inganta ilimin Hadisi da sauran fannoni na addini a jami’ar da kuma a tsakanin dalibai.
Sheikh Sani Rijiyar Lemo ya kasance daya daga cikin manyan malaman Najeriya, kuma wannan karin girma na tabbatar da bajintarsa a fannin ilimi.