A ranar Asabar, 21 ga watan Disamba, 2024, kamfanin man fetur na Najeriya (NNPCL) ya sanar da rage farashin fetur daga N1,020 zuwa N899 a kan kowace lita. Wannan mataki na nufin tallafawa ‘yan kasuwa da rage farashin man a cikin ƙasar.
Masu saye daga wuraren rumbun ajiyar mai na Warri da Fatakwal za su biya N970, yayin da matatar Dangote ta riga ta daidaita farashin litarta a kan N899. Wannan sabuwar farashi ta biyo bayan rage farashin da matatar Dangote ta yi kwanakin baya.
Kakakin Ƙungiyar Masu Sayar da Man Fetur (PETROAN), Dr. Joseph Obele, ya nuna cewa akwai yiwuwar farashin fetur zai ƙara raguwa kafin ƙarshen Janairu 2025, bisa ga faɗuwar farashin ɗanyen mai da karfin Naira akan dala.
Shugaban PETROAN na ƙasa, Billy Harry, ya bayyana cewa wannan rage farashi zai kawo sauƙi ga masu ababen hawa da ‘yan Najeriya a lokacin hutun karshen shekara. Wannan matakin na NNPCL na da matukar muhimmanci wajen rage wahalar da masu amfani da man fetur ke fuskanta a Najeriya.