Babban hafsan sojojin ƙasan Najeriya, Laftanar Janar Olufemi Olatunbosun Oluyede, ya bayyana matakan da ake dauka domin kawo karshen ‘yan ta’addan Lakurawa a yankin Arewa maso Yamma. A cikin jawabin da ya yi a taron shekara-shekara na COAS a Abuja, ya nuna cewa jami’an tsaro na ƙara zafafa kai hare-hare kan ‘yan ta’addan.
Laftanar Janar Oluyede ya tabbatar da cewa sojojin Najeriya suna shirin kawar da duk wata barazana ga tsaron ƙasar, ta hanyar gudanar da hare-hare ta sama da ƙasa, da kuma tura dakaru na musamman. Ya kara da cewa suna samun karin bayanai daga al’umma, wanda hakan ke taimakawa wajen gudanar da ayyukan su.
Hafsan sojojin ya bayyana cewa suna aiki tare da mutanen ƙauyaku domin samun karin bayanai da haɗin kai wajen tunkarar ‘yan ta’addan. Ya jaddada muhimmancin tsarin yin amfani da ƙarfin soji da dabaru a cikin wannan yaki, domin tabbatar da zaman lafiya a yankunan da matsalar tsaro ta shafa.
A wani labarin, sojojin Najeriya sun samu nasarar cafke wani shugaban ‘yan ta’adda, wanda hakan ya ƙara tabbatar da ƙudirin su na kawo karshen wannan matsala.