Ooni na Ife, Oba Adeyeye Ogunwusi, ya kai ziyara ga tsohon shugaban kasa, Muhammadu Buhari, a jihar Katsina, inda ya bayyana matuƙar yabon sa ga Buhari bisa kokarinsa a lokacin mulkinsa daga 2015 zuwa 2023.
A yayin ziyarar, Oba Ogunwusi ya shaida wa manema labarai cewa Buhari yana cikin koshin lafiya da walwala, duk da shekarunsa. Ya ce: “Yanzu haka ya zama kamar an rage masa shekaru 30. Idan ka gan shi, za ka yi mamakin yadda yake cikin nutsuwa da kuzari.”
Basaraken ya nuna cewa ziyarar ta ba su damar tattauna muhimman batutuwan da suka shafi ci gaban Najeriya. Ya jaddada cewa Buhari ya yi kokari sosai wajen jagorantar ƙasar kan hanya madaidaiciya, yana mai cewa, “Wannan taron ba kawai ziyara ta sada zumunci ba ce, amma wani muhimmin mataki ne na diflomasiyya.”
Oba Ogunwusi ya bayyana cewa Buhari ya yi aiki mai kyau a lokacin mulkinsa, yana ba da tabbaci ga al’ummar Najeriya cewa yana cikin koshin lafiya sosai. Wannan ziyara ta jaddada kyakkyawar alaƙa tsakanin masarautar Ooni da tsohon shugaban kasa, tare da nuna muhimmancin tattaunawa tsakanin shugabanni a fadin ƙasar.