Gwamnan jihar Katsina, Malam Dikko Radda, ya sanar da sabon mafi ƙarancin albashi ga ma’aikata a jihar. An amince da N70,000 a matsayin sabon mafi ƙarancin albashi bayan an kammala tattaunawa kan wannan batu.
A cikin sanarwa da ya fitar, Gwamna Radda ya bayyana cewa za a fara biyan sabon tsarin albashin daga watan Disamba na shekarar 2024. Wannan sabon tsarin albashi zai shafi ma’aikata a dukkan ɓangarorin gwamnati, ciki har da jihohi, ƙananan hukumomi, da hukumar kula da ilimi ta ƙananan hukumomi.
Gwamnan ya nuna godiya ga ma’aikatan jihar bisa haƙurin da suka nuna a lokacin tattaunawar. Ya ce, “Barkanmu da safiya Katsinawa, bayan tattaunawa mai inganci, ina mai farin cikin sanar da amincewa da N70,000 a matsayin sabon mafi ƙarancin albashi.”
Wannan mataki na gwamnan na nuni da kokarin inganta rayuwar ma’aikata a jihar Katsina, tare da fatan ganin karin jin dadin ma’aikata da ingancin aikin gwamnati a jihar.